Die tiener-naelloopsensasie van Bloemfontein, Rumé Burger, sê sy voel geseënd en nederig nadat sy haar heel eerste goue medalje gewen het by die 2025 ASA Senior Nasionale Atletiekkampioenskappe in Potchefstroom.
Die 17-jarige blits van die Vrystaat het Suid-Afrika Saterdag verstom deur die vroue-200m-eindstryd by die McArthur-stadion te wen. Sy het ’n uitmuntende vertoning gelewer en nie net een nie, maar albei gunstelinge vir die titel uitgestof.
Burger het ’n indrukwekkende tyd van 23.49 sekondes aangeteken om die goue medalje in die 200m in te palm – en opvallend genoeg was dit nie eens naby aan haar persoonlike beste nie. Sy het ’n seldsame dubbele oorwinning behaal dié seisoen, nadat sy vroeër in April ook goud gewen het in die 200m by die Junior Nasionale Atletiekkampioenskappe in Kaapstad.
Met haar oorwinning Saterdag het Burger beide die nuwe Suid-Afrikaanse 100m-kampioen, Joviale Mbisha, en die baie belowende Hannah Hope Vermaak geklop.
Die oudste dogter van die voormalige Toyota Cheetahs- en Springbok Sewes-spoedvraat Philip Burger, het aan Bloemfontein gesê dat dit ’n groot voorreg vir haar was om teen die land se beste te kon meeding – en om met die goue medalje weg te stap, het dit net meer besonders gemaak.
“Dit is my grootste voorreg om te kan sê dat ek nie net die SA-kampioen onder 17 vir die 200m is nie, maar ook die SA-kampioen vir seniors vir 2025 – dit is ’n absolute droom.
“En ek dink nie daar is woorde wat kan beskryf hoe opgewonde ek is vir die seisoen wat voorlê en vir wat nog gaan kom hierdie jaar nie. Vir 2025 dink ek ek het definitief my deel gedoen.
“Nadat ek ’n bietjie van ’n teleurstelling gehad het in 2024, dink ek ek het definitief my naam herstel. En ek is so dankbaar om te kan sê dat ek die geleentheid gehad het om teen hierdie senior vroue te hardloop – vroue met ongelooflike talent en baie ondervinding in atletiek.
“Veral Chané Vermeulen en Joviale Mbisha, wat al vir jare lank atletiek beoefen – om te kan sê dat ek teen die beste van die bestes gehardloop het en dat ek deel was van geskiedenis, is vir my die grootste voorreg. Ek is so opgewonde vir wat nog gaan volg.”
Op dag een van die nasionale kampioenskappe het Burger ook ’n bronsmedalje in die 100m-eindstryd verower, waar sy agter Mbisha en haar mede-Bloemfonteinse naelloper, Gabriella Marais, geëindig het.
Mbisha was op skool by Hoërskool Sasolburg en het drie jaar aan die Universiteit van die Vrystaat gestudeer voordat sy by UJ aangesluit het. Marais, wat verlede jaar die bronsmedalje gewen het, was op St. Michael’s in Bloemfontein en is tans deel van Kovsies. Marais word geslyp deur die Vrystaat en Suid-Afrikaanse atletieklegende, tannie Ans Botha. – MORGAN PIEK
