Suid-Afrika se vinnigste tiener, Stuart White, het uiteindelik sy “vlerke” gekry. Die jong renjaer van Bloemfontein het Dinsdag sy kode 4-rybewys geslaag, slegs ‘n dag na sy 18de verjaardag.
Ironies genoeg het dié spoedvraat vanjaar reeds lank staande baanrekords van groot name soos Ian Schekter in Suid-Afrika gebreek terwyl hy ook al vir ‘n geruime tyd vir Sauber in die Franse Formula 4 jaag.
Voordat White ‘n ses-jaar-kontrak met die Switserse Formula 1-span gesluit het, het hy al vir baie jare “rubber oorsee asook plaaslik gebrand”.
Dit was egter onwettig vir hom om ‘n motor op enige pad in Suid-Afrika te bestuur.
Die tiener, wat vanjaar ook sy skoolonderrig gaan voltooi, sal hy eerskomende Saterdag op Phakisa in Welkom aan die laaste ronde van die nasionale Enduro-reeks deelneem.
Die Alfa-motor waarmee hy Donderdag na Welkom ry, is ook die amptelike tempo-motor vir die wedren. – MORGAN PIEK
