Die Vrystaat Kunstefees keer in Julie 2026 terug met ’n skouspel van kreatiwiteit en talent, en hierdie keer is die deur wyer oop as ooit tevore. Of jy nou sing, dans, toneelspeel, skilder, skryf of enige ander storie het om te vertel – dit is jóú oomblik.
Die fees vind van 7 tot 11 Julie 2026 op die kampus van die Universiteit van die Vrystaat plaas, en inskrywings vir die 2026-uitgawe sluit binnekort. Moenie talm nie: spring gou in voordat die kollig op iemand anders val!
Groot nuus vir kunstenaars: vir die heel eerste keer is die amptelike aansoekvorms in Afrikaans, Sesotho én Engels beskikbaar. Só word die fees werklik toeganklik vir elke kreatiewe siel in Suid-Afrika.
Feesdirekteur Michael Garbett is duidelik opgewonde oor wat voorlê. Hy sê: “Ons nooi elke kreatiewe mens in Suid-Afrika uit om hul talent te kom wys, die fees saam met ons te geniet en deel te word van iets besonders. Moenie wag nie – skryf nou in en kom vier kuns saam met ons in Julie.”
Hy voeg opgewonde by: “Die opwinding begin reeds weer borrel. Dit is werklik ’n besonderse geleentheid om aan deel te neem. As jy nog twyfel – doen dit net!”
Datums om te onthou:
- Hooffees, Vrynge en Vryliks: inskrywings sluit 28 November 2025
- Kunsmark: aansoeke oop tot 27 Februarie 2026
Belangstellendes kan die aansoekvorms maklik aflaai vanaf die Vrystaat Kunstefees se sosiale-media-bladsye. Volg die amptelike bladsye vir skakels en die nuutste nuus.
Vir navrae:
Hooffees: Daniel Kruger: [email protected]
Vrynge & Vlieks Juné Pretorius: [email protected]
Saamgestel deur Warren Hawkins
