Owen Kock
Bloemfontein. – ‘n Bloemfonteinse gesin is ongedeerd na ‘n brand vanoggend hul huis in Uitsig in puin gelê het.
Die Bloemfonteinse brandweerdiens is tans besig om die vuur te blus, terwyl die ouers en twee kinders wat uit die huis gered is vir rookinaseming by die Life Rosepark-hospitaal in die stad behandel word.
ER24-woordvoerder Lukas Bezuidenhout is tans op die toneel en vertel dit lyk of die huis heeltemaal verwoes is.
"Op die oomblik is die stadsbrandweer steeds besig om die brand te probeer blus. Ons het die oproep sowat 06h00 gekry en die inwoners van die huis by die bure gekry en hulle vir rookinaseming behandel, waarna hulle na Rosepark vervoer is vir behandeling.
"Die huis lyk of hy redelik erg beskadig is en dit brand op die oomblik nog steeds, hoewel ons dit probeer blus," het Bezuidenhout kort voor 07h00 vanoggend laat weet.
