Die Toyota Cheetahs het Maandag na Frankryk vertrek vir ‘n welkome terugkeer na internasionale mededinging met die span wat aan die Europese Uitdaagbeker gaan deelneem.
Daar is selfs meer goeie nuus vir die span, aangesien ‘n terugkeer na Australië en Nieu-Seeland ‘n werklikheid kan wees en die onderhandelinge in ‘n gevorderde stadium is.
Spanne van Australasië wat sake sal uitspook teen die Cheetahs, is spanne wat aan SuperRugby deelgeneem het, maar dit is nog nie 100% gefinaliseer nie.
Terwyl die een Australiese span redelik bevestig is, word geglo dat verskeie van die Nieu-Seelandse spanne gretig is om die Cheetahs tuis en weg te akkommodeer.
Die uitvoerende hoof van die Cheetahs, Ross van Reenen, het die spelers Woensdagoggend ingelig dat hulle bereid moet wees om in 2023 ná afloop van die Curriebeker oorsee te speel. Die wedstryde teen die Nieu-Seelandse en Australiese spanne sal ná die Curriebeker, wat in Augustus afgehandel word, plaasvind.
Boonop het die veelbesproke Interkontinentale Skild die groen lig gekry. Die Interkontinentale Skild sal toesien dat die Cheetahs teen ongeveer agt verskillende spanne te staan kom en die tydlyn vir hierdie toernooi val saam met die 2023 Rugby Wêreldbeker in Frankryk. Hoewel die spanne nog nie bevestig is nie, sal dit waarskynlik spanne van nasies soos Roemenië en Georgië wees.
Van Reenen het aan Bloemfontein Courant gesê dat hul Europese Uitdaagbeker ‘n gulde geleentheid vir die span is en nou sal hulle moet uithaal en wys.
“Vir ons om in Europa aan die Europese Uitdaagbeker deel te neem, is ‘n massiewe voorreg,” het Van Reenen gesê.
“Ek wil ook vir Jurie Roux (uitvoerende hoof van SA Rugby) bedank omdat hy regtig baie instrumenteel was om dit te laat gebeur.
“Ons is al soveel jare daaruit en ons het nie onlangs oorsee gereis nie. Ons het die Opkomende Ierse span en die VSA-span hier in die Toyota Challenge gehad, maar hierdie is ‘n massiewe geleentheid vir die spelers en hulle is baie opgewonde.
“Ek het nou met ‘n paar spelers gepraat en hulle is só gereed om te gaan.”
Die Cheetahs pak Section Paloise Saterdag om 15:00 in Pau in hul geskiedkundige eerste wedstryd van die Europese Uitdaagbeker. – MORGAN PIEK
