Die ITEC Knights is verheug met hul goeie vertoning verlede Donderdag op die 2024 Krieket Suid-Afrika-toekenningsaand in Midrand.

Die Knights het verskeie eerbewyse ontvang met JP Triegaardt wat as die Afdeling 2 Afrigter van die Jaar aangewys is, en Garnett Tarr as die Afdeling 2 Eendagbekerspeler van die Jaar. Yolandi Potgieter is aangewys as die SACA Mees Waardevolle Speler van die Jaar en die Vroue Plaaslike Speler van die Jaar, terwyl Martin Thlake as die Opsigter van die Jaar aangewys is. Francois van Rooyen is boonop ook aangewys as die KSA Plattelandse Krieketspeler van die Jaar.

Die Knights se hoof uitvoerende beampte, Johan van Heerden, het aan Bloemfontein Courant gesê dit was ‘n ongelooflike toekenningsgeleentheid, en met die insette van die nuwe minister van sport, Gayton McKenzie, verwag hulle vorentoe positiewe dinge in krieket.

“Ek dink die hele Suid-Afrika kan uiters trots wees op hoe Krieket Suid-Afrika hul toekennings gedoen het,” het Van Heerden gesê.

“Dit was wonderlik om te sien hoe die nuwe minister van sport, Gayton McKenzie, ook betrokke was. Hy het genoem hoe goed al die atlete vir die jaar gevaar het en hy het ook gekyk na al die oud-spelers en hoe hy hulle sou gebruik om krieket sterker en die nommer een sport in Suid-Afrika te maak.”

Van Heerden het bygevoeg wanneer dit by Vrystaat Krieket kom, was die feit dat hulle talle toekennings ontvang het baie positief en dit is ‘n tree in die regte rigting, aangesien hulle op die punt staan om die 2024/25 binnelandse seisoen te betree.

“Ons is uiters trots op ons vertonings en die toekenningwenners: JP Triegaardt as die Afrigter van die Jaar, Garnett Tarr as die Eendagspeler van die Jaar, Yolandi omdat sy twee toekennings gewen het – as SACA se Waardevolste Speler en as die Vroue Plaaslike Speler van die Jaar – en Martin Thlake wat die Opsigter van die Jaar was.

“Ons is baie trots op hierdie vertonings, maar behalwe dit, ook die spanvertonings van beide die mans en vroue, en ons kinders op nasionale weke. Dit was ‘n moeilike jaar en ‘n half vir ons om gerelegeer te word, maar ons het nou deur daardie stryd geveg en hopelik hierdie jaar met die vertonings en ook die toekennings wat ons gekry het, sien ons uit na ‘n jaar waartydens ons heel waarskynlik nie sal kan oorheers nie, maar dalk kan terugkeer as een van die top-drie.

“So, dit was ‘n groot toekenningsaand wat alle Suid-Afrikaners trots gemaak het en dit was vir ons wonderlik om op so ‘n manier by te dra.”

Intussen is die voormalige Knights-snelbouler, Marco Jansen, wat nou by die North West Dragons is, as die SA Manskrieketspeler van die Jaar aangewys.