Die nuwe Toyota Cheetahs-losskakel, Zander du Plessis, sal na verwagting Vrydagaand sy buiging maak wanneer die span in die eerste van twee wedstryde teen Black Lion van Georgië in Bloemfontein te staan kom in die Toyota Uitdaagreeks.
Die 25-jarige, wat as losskakel, binnesenter én heelagter kan speel, het Maandag by die Cheetahs aangesluit en het reeds tydens oefeninge ’n indruk gemaak.
Du Plessis is nie ’n vreemdeling in Bloemfontein nie. Hy het by Grey Kollege gematrikuleer en 1ste XV-rugby saam met spelers soos Franco Smith jr. gespeel. Dié speler, wat die rekord hou vir die meeste punte in ’n Varsitybeker-seisoen, het vir die Universiteit van Pretoria (Tuks) gespeel, waar hy hulle in 2021 as heelagter na die titel gehelp het.
Hy het daarna by die Griekwas in Kimberley aangesluit en was die begin-agterlyngeneraal in die 2022-Curriebeker-eindstryd toe die Poubloues teen die Pumas in Kimberley verloor het. Ná ’n kort tydperk by die Lions in Johannesburg, met beperkte speeltyd, bevind Du Plessis hom nou weer in Bloemfontein.
Du Plessis het aan die Bloemfontein Courant gesê dat hy opgewonde is om terug te wees waar alles vir hom as rugbyspeler begin het.
“Ja, dit is fantasties om terug te wees in Bloemfontein – die plek waar dit vir my alles begin het,” sê Du Plessis. “Ek dink dit is ’n wonderlike geleentheid en ek weet hoeveel die Cheetahs vir die mense van Bloemfontein en die Vrystaat beteken. Ek is dus baie opgewonde om aan die gang te kom en by te dra tot die span.”
Du Plessis, soos sy nuwe hoofafrigter Frans Steyn, is besonder veelsydig en kan verskeie rolle vervul, terwyl hy ook oor ’n kanonpoot beskik.
Steyn het aan die Bloemfontein Courant gesê dat dit nie altyd maklik is vir ’n speler om veelsydig te wees nie, maar dat hulle sal bepaal watter rol die beste by Du Plessis pas – en dat die verantwoordelikheid ook by die speler self lê.
“Ons het Maandag hieroor gesels – ons het baie spelers wat verskeie posisies kan dek, wat nie altyd maklik vir hulle is nie,” sê Steyn. “Dit is iets wat ons moet uitwerk en hopelik kan ons die perfekte posisie vir hom vind. Hy het Maandag aangekom, onmiddellik aan oefening deelgeneem en hy lyk goed – hy moet net weer in rugby kom. “Hy is ’n groot ou en ek dink ons gaan dit geniet om ’n sterker teenwoordigheid in die middelveld te hê, iemand wat die bal hard kan dra wanneer ons dit nodig het, veral op buitelandse toere. Maar daar is nog ’n lang pad om te gaan. Hy moet by die span inpas met sy persoonlikheid en styl, so hopelik verloop alles goed.”
Intussen skop Vrydag se eerste wedstryd van die Toyota Challenge tussen die Cheetahs en Black Lion om 18:00 af by die Toyota-stadion in Bloemfontein. – MORGAN PIEK
