Bloemfontein – Die Springbokke is honger vir hul eerste toetsoorwinning teen die All Blacks op Eden Park sedert 1937.
Die twee spanne sê mekaar more die stryd aan in ’n rugbykampioenskapskragmeting in die stad.
Die Suid-Afrikaners het nog net twee keer in nege wedstryde by die stadion koning gekraai – in 1921 en 1937.
In 1994 het hulle met 18-elk gelykop gespeel teen die Kiwi’s. 1994 was ook die laaste keer wat die All Blacks daar verloor het – die eindtelling 23-20 teen Frankryk.
Bokkaptein, Jean de Villiers sê om spelers in sy span te hê wat nog nooit teen die All Blacks uitgedraf het nie, is nie noodwendig ’n nadeel nie.
Hy sê hierdie spelers sien die kragmeting as net nog ’n toets, wat ’n positiewe energie in die groep meebring.
De Villiers het bygevoeg dat wedstryde teen die Nieu-Seelanders altyd iets besonders is.
Die toets in Auckland skop om 09:35 af.
