Willem Postma het hul 80ste bestaansjaar met groot geesdrif gevier. Die feesvieringe het in die saal afgeskop met Teambo, wat groot pret vir die kinders en onderwysers gebring het. Daar was videoboodskappe van bekendes soos Phillip de Vos, Anton Goosen en Wilhelm van der Walt. Verskeie skoolhoofde van buurskole het ook seënwense aan die skool oorgedra.
Soos in die jare waarin Willem Postma ontstaan het, is die kinders bederf met mosbolletjies en lemoensap – net soos toe die kinders in daardie tyd ’n mosbolletjie en halwe lemoen by die skool ontvang het. Hierdie vieringe het nie net die geskiedenis van die skool gevier nie, maar ook die volgende generasie leerders met hoop en visie geïnspireer.
Die saal was stil en aandagtig toe Liam Shaw, ons hoofseun, sy boodskap gedeel het: “Wees vinnig om lief te hê en stadig om te oordeel. Skud jou vere reg – ons mag soos katte lyk wat room gekry het, want lewe is diens.” Lisa Bornman, ons hoofmeisie, het ook diep indruk gemaak met haar woorde: “People can live for a hundred years without really living one minute.” Gaan groot, Possie – ons sien uit na die volgende 80 jaar van uitnemendheid!
– Ané van Schalkwyk (gr. 6 O’Kulis-redaksie)
