‘n Onbekende bedrag geld is vanmiddag van Fidelity Coin Services gebuit by ‘n onderneming in Ambulansstraat in Hilton, Bloemfontein. Courant se Earl Coetzee is op die toneel waar talle polisievoertuie en -lede besig is met die ondersoek na die voorval wat omtrent ‘n uur gelede plaasgevind het.
“Volgens ooggetuies het ‘n onbekende getal mans die agterste ingang van C & F Motor Spares binnegestorm en daarop aangedring dat die werknemers van Fidelity Coin Security hulle na die kluis neem. Gelukkig het een van C&F Motor Spares se werknemers hulle gehoor en hy het vinnig die deure gesluit en seker gemaak niemand kan in- of uitgaan nie. Dit het daartoe gelei dat slegs die geld wat reeds in die Fidelity Coin-wa was, gebuit is, en geen van C&F se eie geld nie,” sê Coetzee.
Volgens ooggetuies is geen van C&F Spares se werknemers beseer nie. Een van die Fidelity Coin-werknemers is egter in die gesig geslaan en sy nek is beseer. Buiten die geld is ‘n aanvalsgeweer ook gebuit.
