Die ANC in die Noord-Kaap het ook hul steun vir Adjunkpresident Cyril Ramaphosa uitgespreek om president Jacob Zuma as leier van die party op te volg. Nuutverkose sekretaris, Deshi Nxanga, het gisteraand op Colesberg die konferensieverklaring uitgelees wat gesê het dat wanneer die party se opvolgstryd begin, hulle die tradisie van adjunkopvolger sal steun. Hy’t gesê die afgevaardigdes het eenparig ooreengekom dat die ANC in die Noord-Kaap, wanneer die debat deur die Nasionale Uitvoerende Komitee geopen word, sal aandring op die nakoming van die tradisie dat die adjunkpresident as president verkies moet word wanneer die huidige president se termyn verstryk. News24 berig ‘n afgevaardigde het blykbaar tydens ‘n kommissiebespreking versoek dat die provinsie openlik Ramaphosa steun, maar dit is afgekeur omdat steunwerwing nog nie amptelik begin het nie. Die Noord-Kaap is die eerste provinsie om steun vir Ramaphosa tydens ‘n konferensie te verklaar. Ramaphosa het ook Vrydag die kongres toegespreek en gevra vir eenheidsgesindheid voor die Desember-verkiesingskonferensie.
News 24
