Die begroting van die Mangaung Metro Munisipaliteit vir die 2021/2022 boekjaar sluit tariefverhogings vir dienste en belasting in, wat inwoners se sakke behoorlik gaan skud.
Volgens OFM Nuus sê Vryheidsfront Plus raadslid, Elizabeth Snyman-Van Deventer, haar party was genoodsaak om teen die begroting te stem nadat dit gister tydens ‘n raadsvergadering ter tafel gelê is.
Sy sê verhogings is baie hoër as inflasie en inwoners van Dewetsdorp, Wepener en Vanstadensrus se tariewe het sedert hul insluiting by die metro met 403% gestyg.
Hierdie verhogings kom te midde van onderhandelinge met die Mangaung Concerned Community – ‘n drukgroep wat vroeër vandeesmaand teen onder meer swak dienslewering betoog het en die stad tot stilstand geruk het.
Vrystaat Premier Sisi Ntombela het ingegryp en ‘n taakspan aangestel om die inwoners se klagtes aan te spreek.
Snyman-Van Deventer sê terwyl die begroting peperduur tariewe vir inwoners insluit, word die salarisse vir munisipale amptenare en raadslede onderskeidelik met 6.3% en 7% verhoog.
OFM-nuus/Cathy Dlodlo
