Ayan Beisenbayev van Kazakstan en Barbera de Koning van Nederland het Sondag in snikhete hittetoestande by Maselspoort die 2023 Afrika-driekampbeker in Bloemfontein gewen.
Daar was ‘n sterk wind die oggend, wat ook vir ‘n paar interessante wedrenne gesorg het, maar dit het skaars ‘n uitwerking op die middagwedrenne gehad aangesien die internasionale driekampatlete hul oorheersing laat geld het.
Beisenbayev het die mans se elite-wedloop in ‘n tyd van 55:28 gewen nadat hy die voortou geneem het in die 5 km-wedloop, wat hy in 15:38 voltooi het.
Bob Haller van Luxemburg het tweede geëindig, net nege sekondes later om die silwer te wen, terwyl James Edgar van Ierland die podium afgerond het deur derde te eindig.
Dylan Nortjé was die eerste Suid-Afrikaner wat die eindstreep in die manselite oorgesteek het in ‘n tyd van 56:36. Sy poging was slegs goed genoeg om die sesde algehele plek te behaal.
Die Nederlander, De Koning, het van begin tot einde die pas aangegee om die vroue-elite-wedloop in 1:03:05 te wen. Die 2022-kampioen, Shanae Williams van Suid-Afrika, het 28 sekondes later die silwermedalje gewen, terwyl Tanja Stroschneider van Oostenryk derde geëindig het.
Die plaaslike driekampatleet, Jayme-Sue Vermaas, het in die algehele 11de plek in ‘n tyd van 1:09:57 geëindig.
In die Afrika Driekamp Juniorbeker het Alessandro Fanicchi die junior manswedloop in ‘n tyd van 1:06:32 gewen om sy mede-Suid-Afrikaner, Francois de Villiers, te klop wat silwer in 1:07:29 gewen het. Nathan Foster het dit ‘n volle podium vir Suid-Afrika gemaak deur die brons in ‘n tyd van 1:08:47 te neem.
Dit was ook ‘n volle podium vir Suid-Afrika in die junior vroue-driekamp, met Kadence Ribbink wat die titel in 1:11:34 ingepalm het. Sy het ‘n gemaklike oorwinning behaal, met Lomé Gouws wat die silwermedalje in 1:14:58 verower het, en Mikhaela de Oliveira wat derde geëindig het in ‘n tyd van 1:15:51. – MORGAN PIEK
