MORGAN PIEK
Bloemfontein – Volgende jaar se superrugbykompetisie skop op 15 Februarie in Bloemfontein af wanneer die Cheetahs en die Lions op die Vrystaat Stadion kragte gaan meet.
Die Sharks en die Bulls kom daarna in die Haaitenk in Durban teen mekaar te staan.
Die Stormers het ’n loslootjie in die openingsronde van die kompetisie.
Die Australiese en Nieu-Seelandse spanne sal eers in die daaropvolgende naweek in aksie wees.
Die Cheetahs se tweede wedstryd is tuis teen die Bulls, waarna hulle op hul toer na Australasië sal vertrek.
Daar gaan hulle teen die Rebels, die Reds, die Hurricanes en die Blues te staan kom.
Die sentraal Suid-Afrikaners gaan in volgende jaar se kompetisie nie teen die Waratahs of die Highlanders uitdraf nie.
