Die polisie in die Vrystraat soek na twee rowers nadat ‘n dokter en sy vrou gisteraand in hul plaashuis by Kroonstad aangeval is. Polisiewoordvoerder, Stephen Thakeng, sê die 71-jarige Jacobus Troskie het omstreeks 19:00 by die huis aangekom. Sy 69-jarige vrou, Natalie, was alleen tuis. Troskie het met sy aankoms iets geruik wat in die huis brand. Hy kon niks vind in die kombuis nie, waarna hy na hul slaapkamer waar sy bedlêende vrou was, is. Thakeng sê Natalie het voorheen ‘n beroerte-aanval gehad. Volgens hom het ‘n man ‘n vuurwapen op Troskie gerig voordat hy in hul slaapkamer kon ingaan. Troskie het nie teruggestaan nie. Hy het teruggeveg en in die gestoeiery daarin geslaag om die booswig se vuurwapen, wat eintlik ‘n plastiese speelgoedgeweer is, by hom afgeneem. Sy aanvaller het hom daarna met ‘n pyp oor die kop geslaan. Die rower het hom na hul slaapkamer gesleep.
Thakeng sê Troskie is op ‘n stoel vasgebind. Nog ‘n man was in die slaapkamer besig om die egpaar se kluis met ‘n hoeksnyer oop te sny. Sy vrou was in hul bed. Troskie is deursoek en ‘n onbekende bedrag geld is afgevat. ‘n Vuurwapen is uit die kluis geneem. Volgens Thakeng is die booswigte met Troskie se Toyota bakkie vort. Troskie se selfoon is ook gebuit. Hy het later daarin geslaag om homself los te wikkel en het na ‘n openbare pad by sy plaas geloop om hulp te ontbied. Troskie is ook met ‘n vuurwapen in die maag geslaan.
Thakeng sê die booswigte het Natalie met ‘n hoeksnyer, ‘n graaf en ‘n byl gedreig as sy nie haar samewerking gee nie. Een van die egpaar se honde is vergiftig. Hy vra enigiemand met inligting om hul naaste polisiekantoor te bel. – Christal-Lize Muller
