Die onlangse styging in temperature in Bloemfontein hou gevare in vir die stad se troeteldiere. Honde, katte, en ander troeteldiere kan ly aan hitte-uitputting, dehidrasie, en selfs sonbrand opdoen.
Reinette Meyer van die Bloemfonteinse DBV deel wenke sodat mense kan verseker dat hul diere veilig is in die bloedige Vrystaatse somers. “Die voorkoming van oorverhitting is noodsaaklik om jou troeteldier se welstand te verseker,” het sy begin. “Dit is noodsaaklik veral gedurende warm weer of in omgewings met hoë temperature.”
Meyer het verder ’n paar belangrike stappe genoem wat geneem kan word om troeteldiere koel te hou. “Maak seker jou troeteldier het gedurende die dag toegang tot skaduryke areas, veral gedurende die warmste tye. As jou troeteldier tyd buite deurbring, sorg dat daar bome, sambrele, of ander strukture is wat skaduwee bied,” het sy bygevoeg.
Meyer verduidelik ook dat dit belangrik is om troeteldiere konstant te voorsien van vars, koel water.
“Kontroleer die waterbak gereeld om seker te maak dit het nie warm geword of verdamp nie. Oorweeg die gebruik van groter waterbakke of voeg ysblokkies by om die water langer koel te hou,” het Meyer gesê. Oefening of speelsessies gedurende die warmste dele van die dag kan gevaarlik raak vir diere. “Stap eerder vroegoggend of laatmiddag wanneer die temperature koeler is,” het Meyer gesê.
“Let ook op vir tekens van oorverhitting soos oormatige hyging, lusteloosheid, of verwarring.” Die temperatuur in ’n motor kan vinnig styg, selfs met die vensters oop. Troeteldiere wat alleen in ’n geparkeerde voertuig gelaat word, kan vinnig hitte-uitputting kry en selfs sterf. “Lig jouself in oor die tekens hiervan by troeteldiere, insluitend swaar hyging, oormatige kwyling, vinnige hartklop, braking, of ineenstorting,” het Meyer verduidelik.
“As jy vermoed dat jou troeteldier hitte-uitputting het, beweeg hom na ’n koel area, bied water aan, en kry onmiddellike versorging van ’n veearts,” het sy gesê.
“Onthou, elke troeteldier is anders, en sekere rasse of individuele diere mag meer vatbaar wees vir hitte-verwante probleme. Dit is kritiek om jou troeteldier noukeurig dop te hou en toepaslike maatreëls te neem om oorverhitting te voorkom,” het Meyer afgesluit
Warren Hawkins
warren@mahareng.co.za
