Voormalige Vrystaatse premier, man aangeval op plaas by Heilbron

0
352
Voormalige Vrystaatse premier, Sisi Ntombela. FOTO: Pierce van Heerden

Die Vrystaatse polisie soek na ’n groep van vier mans nadat ’n oudpremier en haar man Maandag (4/3) in die vroeë oggendure op hul plaas, Holfontein, in die Heilbron-distrik aangeval is.

Sisi Ntombela (66) en haar man, Madala (68), het tussen 02:00 en 03:00 wakker geskrik toe ’n groep onbekende mans hul slaapkamerdeur probeer oopmaak het. Die verdagtes het daarin geslaag om die egpaar te oorrompel en hulle in die slaapkamer te oorval.

“Verskeie eenhede (was laat Maandagoggend) steeds op die toneel en volg alle moontlike leidrade op,” sê Motantsi Makhele, Vrystaatse polisiewoordvoerder. “Odersoeke duur vir eers voort op ’n aanklag van huisroof.”

Die verdagtes het die huis vir geld deursoek en die egpaar se selfone, bankkaarte en ander items gesteel. Sisi Ntombela het ná die aanval na die werkers se blyplek gegaan om hulp te kry om die polisie te ontbied.

Enigiemand met inligting kan die ondersoekbeampte Mosiuoa Mokhethi by 082 525 2303 bel, of die Stop Misdaad-nommer by 08600-10111. Anonieme wenke kan ook op die MySAPS-toepassing gegee word.

OFM Nuus/Zenande Mpame