Bekeng e fetileng, letona la tsa Kgwebo le difeme tsa dihlahiswa Rob Davies o ile a etela motse wa Botshabelo. Leha serame se batang se ne se kenella masapong, letona ha le aka la setiswa ke letho bakeng sa ho ntshetsa pele morero wa ho fana ka puo le ho bula lenaneo la ho tlisa mesebetsi setjhabeng sa Botshabelo.Maikemisetso a letona Davies le mmuso wa profensi ya Foreisetata e ne ele ho bula semmuso difeme tsa dihlahiswa kahara motse. Davies ya neng a feleheditswe ke letona la la tsa selehae, Sam Mashinini o ile a tshetlehela batho ba motse wa Botshabelo puo mabapi le mesebetsi eo a tlo e kgakolwa kahara motse ona. Puong ya hae, Davies o ile a tshepisa setjhaba hore bonyane ke batjha ba ka bang dikete tse leshome ba tla una melemo le lehlohonolo ho iphumanela mesebetsi e fapafapaneng. “Mmuso o hlokometse hore ke batjha ba bangata ba hlokang mesebetsi ka hara motse ona wa Botshabelo. Ke ka hoo ho bileng le qeto ya hore ho tlo kgakolwa lenane lena e le tsela ya ho tlisetsa batjha mesebetsi,” ho halosa Davies.
Maikemisetso a lenaneo lena la mmuso ke ho thusa setjhaba hore se iphumane se ena le seabo se seholo bakeng sa ho ba le dikgwebo tseo e leng tsa bona kahara difeme tsa motse. Difeme tsena tse kgakotsweng semmuso ke letona di kenyeleditse difeme tsa dihlahisa tse kang masela le tse ding tse ngata. Mmuso o beheletse bonyane tjhelete e kaalo ka R24 million bakeng sa mohato wa pele wa lenaneo lena le bileng le kenyeleditseng ho kenya terata, mabone a seterateng le disebediswa tse ding tsa motlakase. Mathapelo Sebolai ( 27) ya dulang motsaneng wa di-F o itse ketelo ya letona e tlisitse tshepo haholo ho batho ba Botshabelo ba llang ka leqeme la mesebetsi. Motjha enwa ya pasitseng sehlopha sa leshome le metso e mmedi o hlalositse hore ke dilemo tse mmalwa a sa sebetse jwale. Mme o itse o tseba ho loha le ho roka hantle. Empa a hlolosa hore a ka thabela ho leka dintho tse ntjha tse ka tlisang diphethoho bophelong ba hae. “Ke nako e telele ke phela ka thata. Empa ke na le tumelo le tshepo ya hore le nna ke tlo una molemo lenaneong lena la letona. Ho nna ho thata haholo ho hlokomela lelapa laka,” o buile jwalo. – Matseko Ramotekoa
info@bloemfonteincourant.co.za
