Morati enwa wa ho taka o etsa ditshwantsho tse ntle haholo.
Thabo Sejesho ( 27) o tumme ka ho taka motsaneng wa habo wa di-D lekeisheneng la Botshabelo. Lerato la Thabo la ho taka le qadile kamora ho ithutela ho etsa dipala-menwana koletjheng ya Motheo ho la Bloemfontein. Leha e le hore Batswadi ba hae ha ba sebetse, Thabo o ile a etsa bonnete ba hore o ipha monyetla wa ho ntsetsa dithuto tsa hae pele. Lebaka ke hobane, o ne a sa batle ho iphumana a sena seo a ka itshwarellang ka sona bophelong.
Ha a le dilemo tse supileng feela, Thabo o ne a se a ntse a taka ditshwantsho tse kgahlisang haholo. Ha bashanyana ba dilemong tsa hae ba ne ba sa tsebe seo ba ka se etsang, Thabo yena o ne a inkela dipampiri tsa hae le mekgabiso a etsa ditshwantsho. Taba ya ho taka ya Thabo e qadile ha a ne a ntse a le sekolong se tlaase. Kamehla mohlankana enwa o ne a thabela ho sheba dinepe. Ere kaha di ne di mo kgahla haholo, o ne a leka ho taka ditshwantsho tseo a di boneng dinepeng ka boyena. ” Le ha di ne di sa tshwane le tseo ke di boneng dinepeng, taba ya hore di entswe ke nna e ne e nthabisa haholo,” ho rialo Thabo.
Thabo ya neng a na le tjantjello ya ho taka ka bokgabane o ile a sebetsa ka thata ho ka ntlafatsa tsebonyana eo a neng a na le yona. Mme o ile a ikana hore ka tsatsi le leng, o tla etsa mosebetsi o tswang pele. Thabo o motlotlo ka hore o ile a sebetsa ka thata ho ka ntlafatsa tsebo le neho ya hae. Ha morao tjena, o iphumanetse mothusi ya kgonang ho batla bareki ba mosebetsi wa hae. “Ho nna ke tlotla e kgolo ho kopanya mebala e fapaneng ho etsa ditshwantsho tsa mefuta yohle,” ho hlalositse Thabo.
Setsebi sena se hlwahlwa sa ho taka se tsebahala le mose ho mawatle. Leha a sa ka a atleha, ho na le monna e mong wa Ithali ya kileng a mo kopa ho taka setshwantsho sa moradi wa hae selemong se fetileng. Empa ka lebaka la ho hloleha ho se posa, o ile a hloleha ho phetha mosebetsi oo, ha a ka a inehela. Thabo o bolelletse Voice hore o kgona ho taka ditshwantso tsa batho le diphoofolo a sebedisa dipente tsa ho taka.
Ka tjhelete eo a e etsang, o hlokomela kgaitsedi ya hae ya ithutang yunifesithing ya Central Univesity of Technology, Bloemfontein. Thabo o na le tumelo ya hore o tla tuma haholo ka ho etsa dipala-menwana le ditshwantsho tsa hae hobane o sebetsa ka thata. Tsebo eo a nang le yona o e fetisetsa ho batjha ba nang le thahasello ya ho taka. Ha a sa sebetse, o ruta batjha ba bang e le tsela ya ho fetisetsa tsebo le lerato la hae la ho taka ho bona hore le bona ba tsebe ho fihlella bokgoni ba hae. – Matseko Ramotekoa
info@bloemfonteincourant.co.za
