Ds. STEPHAN VAN HEERDEN
As kind het ek op dié wyse na my Pa verwys: Hy was sterk en lank. Vriendelik, tog soms beduiweld. In al die seer van egskeiding en stukkende verhoudings het ek soms gedink aan die oomblikke waar ek net kon sê: “Sjoe, dis my Pa!” Na al die jare sien ek dit by my eie kinders. Met trots praat hulle soms van my, al maak ek hulle ook soms kwaad. Al verstaan ek nie alles van jongmens wees nie, hoor ek tog die woorde van my kinders: “Sjoe, dis my Pa!” In Spreuke 17:6 lees ek: “Vaders is vir hulle seuns ’n sieraad.”
’n Mens sou dit anders kon beskryf: “Pa, jy moet vir jou kinders ’n trots wees”. Nou juis in hierdie tyd is dit so belangrik dat ouers en kinders mekaar moet respekteer en opbou. Ek het gewonder hoe ons ’n antwoord op die vraag sou kon kry. Die volgende opmerking het my laat dink: “Wil ek hê my seun moet soos ek wees?” Op ’n doodgewone manier het ek weer uitgekom by die opmerking aan die begin. Ek hoop dat my klein kinders ook eendag sal kan sê: “Sjoe, dis my oupa!”
Op hierdie wyse het ons in ons gesin gebou aan die sieraad, die edelstene in die kroon. Wat gebeur in jou gesin?
