Sekuriteitsmaatreëls op UV-kampus opgeskerp

0
600
MARINé JACOBS

Sekurteitsmaatreëls is op die Bloemfontein kampus van die Universiteit van die Vrystaat opgeskerp nadat twee studente Sondagnag daar aangeval en beroof is. Woordvoerder van die UV Lacea Loader, sê Alta Rall, ‘n eerstejaar Kovsie student, en haar vriend wat nie ‘n UV-student is nie, is rondom middernag voor Roosmaryn koshuis beroof. Die UV het die voorval as skokkend vir die universiteitsgemeenskap beskryf.

Courant verneem dat die twee in ‘n motor voor die koshuis gesels het toe die rower op hulle toegeslaan is. Volgens Loader is universiteitkampusse dwarsoor die land kwesbare teikens vir misdadigers en sindikate en is die Kovsie-kampus steeds een van die veilige kampusse in die land.

Loader sê addisionele sekuriteitswagte is by die koshuis ontplooi en ‘n voltydse sekuriteitswag is by die toegangshek in Badenhorststraat aangebring. Daarby sal ‘n draaihek ook by dié voetgangershek installeer word en ‘n spreilig sal aangebring word om swak beligte areas rondom Roosmaryn te belig. ‘n Span bestaande uit verteenwoordigers van die SAPD en private vervoer- en veiligheidsmaatskappye sal saamgestel word om nog veiligheidsmaatreëls te ondersoek wat in plek gestel kan word.

Die UV ondersoek ook die moontlikheid om toegangsbeheer vanaf 18:00-06:00 by alle hekke van die hoofingangsroetes na die kampus toe te pas. Studente en personeel sal slegs met hul studente- of personeeltoegangskaarte gedurende hierdie tye die kampus kan binnekom. Maatreëls sal getref word rondom toegang aan besoekers tot die kampus.

Beide Rall en haar vriend is ongedeerd. Geen verdagte is nog in hegtenis geneem nie.