’n Jong meisie van Bloemfontein het die geleentheid by ’n plaaslike salon, Jadie Professionals, gekry om haar lewe om te keer.
Die salon word deur Jadie Herbst besit. Bloemfontein Courant het met die 18-jarige Puleng Leeuw, na verwys as Mami, en haar ma Gale, gesels oor hul reis en wat hulle tot hier gelei het.
Gale werk al 10 jaar saam met Jadie en volgens haar het die twee van hulle oor die jare ’n baie hegte verhouding gevorm. Volgens Gale kom hul familie uit ’n baie moeilike omgewing en ’n paar onvoorsiene gebeure het gelei tot waar hulle vandag is.
Sy het vertel haar dogter het op skool gesukkel, wat daartoe gelei het dat sy onverwags uitgesak het. “Sy het nie skool klaargemaak nie, want sy is geboelie en vir ’n geruime tyd was ek nie bewus daarvan nie.
Ek het eers ’n maand later uitgevind dat sy nie meer skool bywoon nie,” het Gale verduidelik. Op daardie stadium het Mami reeds die skool verlaat. Jadie het ’n maand gelede aangebied om Mami te mentor en haar te leer hoe om hare droog te blaas.
“Mami het al voorheen vir my gesê dat as daar ’n gaping sou wees, sy gretig sou wees om saam met my te werk. Jadie het my toe gevra of ons haar onder ons vlerke kan neem,” het Gale gesê. Volgens Jadie voel sy dat God dit op haar hart gelê het om Mami by te staan.
Sy het verduidelik dat sy ’n paar jaar gelede ’n ‘blow bar’ begin het, maar dit het ongelukkig platgeval toe die persoon wat daar gewerk het, weg is.
“Dit het my laat dink aan Gale se dogter wat sonder ’n doel vir haar lewe by die huis sit. Ek het met Gale daaroor gepraat en ek moet sê ek was nogal verras oor hoe vinnig sy geleer het. Sy het wat nodig is om ’n sukses daarvan te maak,” het Jadie gesê.
FOTO:VERSKAF
Sy het bygevoeg dat sy ná ’n paar weke se opleiding, waartydens popkoppe eers gebruik is, uiteindelik besluit het om kliënte R50 per blaas te vra.
“Al die wins gaan na Mami. My salon baat glad nie daarby nie, want ek wil hê sy moet voel asof sy ’n doel het en haar harde werk beloon word. Kliënte moet weet dat sy nog leer en dat sy skaam is en my werk is om haar te help om haar selfvertroue te bou,” het Jadie verduidelik.
“Namate haar vaardighede groei, sal die prys styg totdat sy uiteindelik gereed is om die volle blaastariewe te hef.”
Mami het aan Bloemfontein Courant gesê sy hoop om van hierdie geleentheid gebruik te maak om iets van haarself te maak en dat sy eendag skool kan klaarmaak en die vermoë kan hê om haar gesin by te staan. Sy sal BlowBarByJ, ’n afdeling van Jadie Professionals, bestuur.
Om Mami op haar reis by te staan, maak seker dat jy vandag nog jou afspraak maak by Jadie Professionals deur 071-635-4857 te WhatsApp.
Justine Fortuin
