Booswigte werp alles in die stryd om motoriste se aandag af te trek en dan te beroof.
Polisiewoordvoerder in Bloemfontein, Chaka Marope, sê dié tipe rooftogte het die afgelope maand in die stad toegeneem.
Hy waarsku inwoners met die oog op die naderende feestyd om op hul hoede te wees en nie slagoffers te word van booswigte se slinkse planne nie.
Marope sê booswigte peuter met elektriese motorhekke sodat dit onklaar raak. Wanneer mense by die huis aankom klim hulle uit hul motors om ondersoek in te stel.
Dit is dan dat hulle aangeval en beroof word. Marope sê eiers word ook gebruik om motors van die pad te dwing.
Booswigte gooi motors se windskerms met eiers, waarna ‘n bestuurder dan ‘n motor tot stilstand bring, om die vensterruit skoon te maak.
Marope sê mense moet onder geen osmtandighede stop nie. Ry eerder stadig verder na ‘n veiliger plek. Meld dit ook by die polisie aan.
Marope sê motoriste word saans ook van die pad gedwing wanneer ‘n kaal vrou in die rigting van ‘n straat hardloop of ‘n ent verder staan en om hulp skree.
Sodra die motor stop storm rowers daarop af en kaap dit. Hy sê motoriste moet weer eens nie stop nie en eerder na die naaste polisiekantoor ry.
In die mees onlangse soortgelyke voorval is ‘n man met ‘n vuurwapen gedreig en van sy motor gekaap by die Raymond Mhlaba-afrit na die N1 in Bloemfontein.
Christal-Lize Muller/Courant-nuus
