OWEN KOCK

Die Oorlogsmuseum in Bloemfontein het verlede week ’n standbeeld onthul wat die 12 000 swart mense gedenk wat die boerekommando’s tydens die Anglo Boere-oorlog bygestaan het. Die standbeeld is vier meter hoog en volg op die onthulling van dié van oud-president Nelson Mandela in Desember op Naval Hill. Dis ook gedoen om sy bydrae tot die bevrydingstryd te erken. Die onthulling het deel gevorm van die Eeufeesvieringe van die ANC in Mangaung.

Die Oorlogsmuseum is verlede jaar vir ’n tydperk gesluit weens opknappingswerk. Daar is onder meer hysbakke vir gestremdes asook ’n nuwe brand- en lugreëlingstelsel deur die departement van openbare werke aangebring. Vir doeleindes van konstruksie moes ontruiming van die uitstallings plaasvind. Die kantoorblok, terrein en restaurant is steeds toeganklik ondanks die opgradering van die parkeerterrein. Die museum sal so gou moontlik ná die restourasiewerk heropen.

Volgens die direkteur van die museum, Tokkie Pretorius, was dit vir hulle belangrik dat dié deel van die geskiedenis nie verlore gaan nie, en is dit die museum se plig om die erfenis te bewaar. “Jy kan nie sekere dele weglaat, omdat dit daardie tyd die politiese ideologie was om dit weg te laat nie. Die museum volg ’n inklusiewe benadering, alle bevolkingsgroepe en alle Suid-Afrikaners is welkom want almal het deel in dié oorlog gehad,” verduidelik Pretorius.

Hy het bygevoeg die standbeeld beteken baie vir die museum en is ’n langtermyn belegging – die hele geskiedenis word verteenwoordig. “Dié oorlog het een van die grootste invloede op die politieke landskap van Suid-Afrika gehad. Jy kan die einde van die oorlog herlei na die stigting van die latere ANC in Bloemfontein in 1912, wat ’n direkte gevolg van die oorlog was,” sê Pretorius.