Vier mense het hul lewe verloor nadat ’n bakkie op die N3, ongeveer 15 kilometer van Villiers na Warden in die Vrystaat, omgeslaan het.
Die voertuig het nege insittendes gehad ten tyde van Sondag (2/6) se voorval, van wie vier op die toneel dood verklaar is. Drie oorlewendes het kritieke beserings en twee het ligte beserings opgedoen, sê Sipho Towa, provinsiale nooddienstewoordvoerder.
Nooddienspersoneel het die beseerdes vinnig na die Alberton-hospitaal in Gauteng en die Mafube-hospitaal op Frankfort vervoer.
In ’n afsonderlike voorval op dieselfde dag het VR Med gereageer op nog ’n ongeluk op die N8, 10 km buite Bloemfontein. ’n Bestuurder het glo beheer verloor en voor aankomende verkeer beland. ’n Pasiënt het ernstige beserings opgedoen en is na die hospitaal gebring, terwyl drie ander ligte beserings opgedoen het.
Die onlangse vlaag ongelukke het die Mangaung-metro genoop om ’n waarskuwing aan inwoners en padgebruikers uit te reik. Die SA Weerdiens het voor die naweek ’n vlak 2-waarskuwing vir hewige donderstorms van Sondag tot Maandag (3/6) uitgereik. Die ongunstige weerstoestande sal na verwagting die Oos- en Wes-Vrystaat, oostelike Noord-Kaap en suidwestelike uithoek van Noordwes beïnvloed.
Qondile Khedama, Metro-woordvoerder, het gewaarsku dat hierdie weerstoestande kan lei tot skade aan eiendom, moeilike rytoestande, vallende bome wat kleiner paaie versper, en plaaslike oorstromings in laagliggende gebiede.
Hy het inwoners en padgebruikers versoek om uiters versigtig te wees gedurende hierdie tydperk en by die volgende veiligheidsmaatreëls te hou:
• Verminder spoed en skakel hoofligte aan om sigbaarheid op die paaie te verbeter.
• Voetgangers moet waaksaam wees wanneer hulle paaie oorsteek.
• Vermy water en oorgange by riviere of strome waar water bokant enkelvlak is.
Inwoners word ook aangeraai om te verseker dat hul erwe behoorlik gedreineer word om wateropeenhoping te voorkom.
In noodgevalle kan die Mangaung-brandweer by 051 406 6666 of 051 409 9600 gebel word, of tolvry by 107.
