Vir die afgelope aantal jare is seker een van die moeilikste fasette van die bediening vir my om mense wat soms net kritiek uitspreek te verstaan en te hanteer. Ek is self baie opgewonde oor die bediening, maar dit is asof sulke mense my soms moedeloos maak. Paulus skryf hieroor in 1 Korinthiërs 12:10 en met die lees daarvan besef ek dat kritiek en die seermaak van mense reeds van die vroegste tye deel van die kerk was. Paulus ontvang onregverdige kritiek van verskeie persone in Korinthe en tog gaan hy voort om met liefde sy geloof uit te leef. Hy besef dat kritiek hom leer om op die Here te vertrou met sy bediening. Hy ervaar die Here se krag en beleef die Heilige Gees in sy lewe. Dit kom veral na vore in die manier waarop hy liefde en selfbeheersing kan uitleef teenoor die mense om hom. Hy sien dit as ’n groei-oomblik! Hierdie tye van kritiek is nooit maklik nie, maar die Here het my deur die jare heen laat besef dat die liefde alles bedek en dat hierdie tye juis geleenthede is waarin Hy dikwels mense oortuig van Sy groot liefde en geduld met die grootste kritici.
Ds. STEPHAN VAN HEERDEN
* Van Heerden is ’n geestelike leier by die NG Klipkerk en ’n pastorale sielkundige.
