HORACE TERRY
Soos ek hier in die kraamsaal sit en wag vir my eersteling om te arriveer het ek baie tyd om te dink. Van die dinge waaraan ek sit en dink is al die gesprekke wat ek al met kliënte gehad het, en die identifisering van moontlike probleme wat in hul finansiële voorsienings mag voorkom op tye wat hulle dit die nodigste het. Een só ’n potensiële probleem wat sy kop kan uitsteek is wanneer jy nie ‘reg’ verseker is nie. Wat bedoel ek met nie ‘reg’ verseker? Jy is nie reg verseker nie wanneer jy eerstens té min versekering, of selfs te veel het. Tweedens is jy nie reg verseker nie, wanneer jy by die uitneem van die versekering nie alle relevante inligting rakende jou risiko aan die versekeraar geopenbaar het nie. Wat bedoel ek hiermee? Jy mag moontlik ’n siektetoestand, gevaarlike beroep of selfs ’n gevaarlike stokperdjie hê wat jy nie aan die versekeraar geopenbaar het met die uitneem van die versekering nie. Wat gebeur as jy ’n eis het wat direk verband hou met die inligting wat nie geopenbaar is nie? In só ’n geval het die versekeraar die reg om jou eis te weier, of net gedeeltelik goed te keur. Dit beteken dat gelde waarop jy staatgemaak het, en in jou beplanning in berekening gebring het, nou nie meer beskikbaar gaan wees nie. Dit kan ’n invloed op jou en/of jou gesin se welstand hê. Hoe kan jy só ’n situasie vermy? Maak seker jy openbaar alles op die stadium wat jy versekering uitneem. Gee eerder te veel as te min inligting deur. Doen ook gereelde hersiening van jou totale finansiële voorsienings en moenie houtgerus raak nie. Sekere versekeraars se kontrakte bepaal dat jy as versekerde hulle in kennis moet stel indien iets rakende jou risikoprofiel sou verander. Maak dus seker jy lees jou versekeringskontrak, en jy hou jou by die bepalings van die kontrak. Maak seker dat jy ‘n geldige eis sal hê wanneer jy dit werklik nodig het. Dié raad is van toepassing op jou langtermynversekering en korttermynversekering. Praat dus gereeld met ’n gekwalifiseerde finansiële beplanner om jou in die regte rigting te lei.
