Kragwoorde gekamoefleer

0
932

As kru taalgebruik jou pla, moet jy nie verder lees nie. PG18 staan bo-aan vandag se Storiesmous, en ook SNLV, met die “L” (vir taal) ‘n dik, onderstreepte en swartgedrukte letter.

Wat ek wel sal doen, is om kragwoorde te kamoefleer. Die woord “kamoefleer” pas toevallig perfek by die onderwerp, nl. militêre terme, of dan anders gestel, Army-taal. Ek het op ‘n wonderlike webwerf afgekom met ‘n ellelange lys (nogal alfabeties) van Army-woorde wat my geslag dienspligtes, Magnus se manne, maar al te goed geken het, en wat intussen grootliks vergete geraak het.

By “A” is daar Afk*kparade, wat selfverklarend is. Hoe goed onthou ek hierdie “parades” op Lenz en later ook Voortrekkerhoogte. Say no more… “B” het o.m. Bedford, Bossies, Balsak en Bokkop. (Agter elke Bokkop…). By “C” is daar Casspirs en Chicken Parade. “D” bevat Dog Tags, Dixies en die gevreesde DB. Die detensiebarakke was die plek waar jy net ‘n onderbroek en ‘n Bybel toegelaat is.

“E” staan vir Evaluasie, en “F” vir Flossie (die C130 Hercules) sowel as Firebucket, waaruit ons die koffie met die blou fieterjoel moes drink. “G” staan vir Gyppo en Gyppo Guts (ons het dit “Jippo” gespel), en “H” is Hardegat en Houding. “I” is Infanterie (die Bokkoppe hierbo), “J” is JL’s (die junior leierskursusse) en “K” is KO en Kapoen (‘n mengsel van k*k en pampoen, wat die kleur van die personeelkorps se barette beskryf het.)

By “L” kry mens Looppas, “M” staan vir Min Dae en ook die Muis van jou R1. Wie sal ooit NAAFI vergeet? Ons het almal die woord gebruik, maar ek het nou eers op die amptelike beskrywing afgekom: “No Ambition, And F*-all Interest.”

“O” staan vir Oumanne, “P” vir P*s-lelie asook Paal-PT en die gehate PTI’s en PF’s. “R” is vir RSM en Roof Ride, “S” staan vir Shaki (amper soos Kapoen), wat sommer ook die kleur van die Santa Maria-onderbroeke beskryf. Daar was ook Tiffie, Uitklaar, Varkp**l en Webbelt.

En dan was daar die G4K4’s. Jippogat suurstofdiewe, die hele lot van hulle!

Albè Grobbelaar