GEPF: Vervroegde aftrede, hoe nou?

0
823
Photo: mandegar.info

Indien jy lid van die GEPF (Regeringswerknemerspensioenfonds) is, en tussen die ouderdom 55 en 60 is, kan jy moontlik kwalifiseer om op vervroegde aftrede te gaan, sonder dat jy gepenaliseer sal word. Dit is in kort waaroor ons verlede week gesels het.

Ek het ‘n aantal navrae van staatsdiensamptenare gehad wat ernstig die vervroegde-aftrede-opsie oorweeg, maar nie bewus is van al hul opsies nie. Indien jy oorweeg om van die opsie gebruik te maak, wil ek jou ook sterk aanraai dat jy so gou moontlik ‘n goed gekwalifiseerde finansiële beplanner gaan besoek vir individuele advies.

Eerstens, indien jy reeds besluit het dat jy van die aanbod gaan gebruik maak, sal jy so gou moontlik jou versoek moet indien by jou departement, aangesien die sperdatum 30 September 2019 is. Maak net seker jou dokumentasie is 100% korrek voltooi, aangesien onvolledige of foutiewe dokumentasie tot vertragings gaan lei.

Maak ook seker jy voltooi die regte dokumentasie, aangesien jy sal moet aandui of jy jou toekomstige pensioen van die GEPF wil ontvang, en of jy self beheer oor jou sake gaan wil neem en eerder ‘n privaat pensioen by ‘n versekeraar gaan aankoop. Indien jy ‘n privaat pensioen wil aankoop, sal die GEPF jou geld belastingvry oorplaas na die versekeraar van jou keuse. Let wel, jy sal jou belastingvrye jare voor Maart 1998 behou, al word jou geld oorgeplaas na ‘n versekeraar.

Weer eens, dit sal wys wees om met ‘n finansiële beplanner te gesels voordat jy die betrokke GEPF-dokumentasie voltooi, aangesien ‘n finansiële beplanner vir jou sal kan uitwys watter roete van aftrede die beste vir jou spesifieke behoeftes is. ‘n Finansiële beplanner sal ook aan jou die voor- en nadele van sowel ‘n “GEPF-aftrede” en “privaat aftrede” kan opsom.

Indien jy besluit om by die GEPF af te tree, kan jy jou dokumentasie so indien en dan sal jy net verder moet besluit hoe jou enkelbedrag (lompsom), verder hanteer moet word. Jou finansiële beplanner kan jou ook hier help, aangesien daar belastingimplikasies kan wees, afhangende van jou jare diens en die grootte van die enkelbedrag wat jy wil neem.

Indien jy egter sou besluit om privaat af te tree, sal jou finansiële beplanner alle beskikbare “pensioenprodukte” (annuïteite) met jou bespreek, en afhangende van jou spesifieke individuele behoeftes, sal jou finansiële beplanner een of twee opsies, of selfs ‘n kombinasie van opsies, aan jou voorlê.

Weer eens sal julle ook oor jou enkelbedrag gesels, aangesien daar belastingimplikasies kan wees. Miskien sal dit in jou geval beter wees om ‘n kleiner enkelbedrag te neem en eerder ‘n groter maandelikse pensioen te neem. Daar is dus ‘n hele proses wat nou voorlê, en die beginpunt sal jou finansiële beplanner wees. Kontak my gerus indien jy enige navrae het.

horace@nassaux.com