CHRISTAL-LIZE MULLER
Die Mangaung-metro het nog geen waterbeperkings ingestel nie, omdat die publiek nog daarvan ingelig moet word volgens die proses van openbare deelname.
‘n DA-wyksraadlid van die Mangaung-metro, Rossouw Botes, sê die metro se oorwegings om waterbeperkings in te stel sloer al vir bykans ‘n jaar, sonder sukses.
Hy sê egter die DA is verheug dat daar in Augustus vanjaar op ‘n raadsvergadering besluit is dat waterbeperkings vir die metro ingestel sal word op voorwaarde dat die nuwe tarief aan die voorgeskrewe vereistes vir waterverbruik voldoen.
Botes sê die proses van openbare deelname wat moet geskied is ook as voorwaarde gestel.
Volgens hom kan die onlangse verspreiding van ‘n interne dokument kon verwarring veroorsaak het onder die publiek oor waterbeperkings wat ingestel word. Dit is egter nie ‘n amptelike dokument nie, maar waterbeperkings moet spoedig ingestel word omdat dit wil voorkom of die metro se beskikbare watervoorraad nie genoeg gaan wees vir verbruikers nie.
