Vier kunstenaars, drie familielede en ‘n vriendin, het koppe bymekaar gesit om die uitstalling, Nest in the Cloud, saam aan te pak.
Mariaan Kotze is gefokus op narratiewe simboliese kuns wat ‘n dieper storie vertel, Hanlie Kotze se drome, wat in haar onderbewuste lê en wag om op ‘n simboliese, kreatiewe manier uiting te kry, word in haar poësie en kuns weergegee. Maritsa Joy Barlow se fotografie is atmosferies, en Hester Hattingh se kleure verbeeld die emosie van die natuur. Haar werk word beskou as atmosferies impresionisties.
Hoewel die vier kunstenaars se kuns baie verskillend is en hulle eklekties te werk gaan, het hulle ‘n gemene deler. Vir al vier hierdie kunstenaars beteken die naam van die uitstalling dieselfde.
“Nests” wek die gevoel van geborgenheid en koestering, “Clouds” simboliseer helderheid van denke, die wonder van die natuur en die Skepper se Almag. Daar is ‘n konneksie tussen jou en die Skepper as jy Sy skoonheid in die wolke aanskou.
Kom kyk gerus na die vier kunstenaars se werk by Gallery on Leviseur in Dan Pienaarrylaan. Dit open op 28 Julie om 18:30 en duur tot 16 Augustus 2017.
Vir meer inligting, kontak Geralda by 082-880-6774 of stuur ‘n e-pos na admin@galleryonleviseur. – Jeretha Oosthuizen
jeretha@mahareng.co.za
Date:
