Een vas na aanval op Bloemfonteinse drawwer

0
617

‘n Verdagte is vanoggend in hegtenis geneem kort na hy na bewering ‘n vrou aangerand en wou beroof het, terwyl sy in Westdene, Bloemfontein by die Musicon-musiekskool gedraf het. Polisiewoordvoerder, Chaka Marope, sê ‘n 33-jarige man verskyn binnekort in die plaaslike landdroshof op ‘n aanklag van poging tot roof en aanranding. Hy sê die vrou het omstreeks 05:00 gedraf toe die verdagte haar genader het. Hy het aangedring op haar selfoon waarna hy haar rondgeruk en met die vuis geslaan het.

‘n Plaaslike fotograaf, Francois van Vuuren, het vroeër aan Courant vertel hy het in sy motor gery toe hy sien hoe die vrou in die straat aangerand word. Volgens Van Vuuren het die booswig weggehardloop toe hy hom gewaar. Van Vuuren sê die vrou het erge beserings aan die gesig. Sy was egter by haar bewussyn. Hy het die booswig, wat toe oor ‘n heining by ‘n nabygeleë meenthuiskompleks gespring het, agterna gesi. Hy is later deur die polisie in hegtenis geneem.- Christal-Lize Muller