Dit is die woorde van ‘n boer, Piet Swanepoel, wat vroeg vanoggend ‘n noue ontkoming op sy plaas buite Smithfield in die rigting van Bethulie gehad het nadat vier aanvallers hom probeer aanval het.
Piet Swanepoel en sy vrou, Anja, se twee honde het omstreeks 03:00 buite die huis geblaf. Die egpaar het toe gebid en gewag voordat Piet omstreeks 05:00 ondersoek gaan instel het.
Swanepoel sê hy het by die huis se voordeur uitgegaan en na die agterkant van die huis gestap. Hy het ‘n bees buite die huis verwag, maar groot geskrik toe hy vier mans sien.
“Ek het aanvanklik nie geskiet nie, want ek het nie geweet of dit net onskuldige mense was wat probeer deurloop het nie. My lewe was toe nie in onmiddellike gevaar nie.”
Swanepoel, wat ook ‘n kroeg op die dorp besit, sê hy het op die mans geskreeu. Een van die booswigte het toe ‘n voorwerp in sy rigting gegooi. Swanepoel het daarna ‘n waarskuwingskoot afgevuur, waarna die booswigte weggehardloop het. Hy het buite die huis gewag terwyl sy vrou hulp ontbied het.
Swanepoel, wat ook die polisie geloof het vir hul spoedige optrede, sê dit is die eerste keer dat hy en sy vrou so iets op die plaas beleef het sedert hulle verlede jaar Mei daarheen getrek het. Hy het ook advies vir diegene wat hulle in ‘n soortgelyke situasie bevind.
“Hou jou wapen altyd by jou, maar moet nie uitgaan nie. As ek vroeër uitgegaan het, sou hulle definitief ‘n verrassing vir my gehad het. Die Here het ons toe beskerm,” sê Swanepoel.
Niemand is nog in hegtenis geneem in verband met die voorval nie. Polisiebeamptes van Bethulie en Smithfield, lede van die Smithfield-landbouvereniging en plaaslike boere was steeds vroeër besig om die gebied te fynkam.
-Mark Steenbok/Christal-Lize Muller
