Twee plaaslike versamelaars met ’n modelmotorstokperdjie, het uit hul pad gegaan om waardering aan die plaaslike brandweerstasie se museum te betoon deur ’n paar modelmotors te oorhandig as ’n huldeblyk aan die Mangaung Brandweer se museum.
Volgens Piet van der Linde en Johan Pottas het hulle albei die modelle in hul bestaande versamelings gehad maar dit het nie noodwendig as deel van hul persoonlike katalogusse ingepas nie. Hulle het besluit om dit te skenk.
“As my geheue my nie in die steek laat nie, is al 12 modelle gebaseer op ’n skaal van 1:43. Die Mangaung Brandweer se museum het reeds ’n paar modelle uitgestal en dié twee het besluit dit sal meer gepas wees as dit aan hulle geskenk word om by hul versameling te voeg,” het Pottas gesê.
Plaaslike inwoners wat op ’n reis deur die geskiedenis wil gaan en dié ryk erfenis by die stad se brandweerstasie wil verken, is meer as welkom om ’n afspraak te maak met die stasie se Braam van Zyl by 084- 818-9144.
Toegang is gratis, maar ’n afspraak is noodsaaklik.
“Ek is dankbaar vir die skenking,” het Van Zyl gesê terwyl hy sy dankbaarheid uitgespreek het vir die nuwe toevoegings tot die museum.
Gypseenia Lion
