Ona ke mosebetsi o tswileng pele wa ho etsa dikgaretene tse kgahlisang tsa dikwahelwana tsa dinwamaphodi.
Mohopolo ona wa ho etsa dikgaretene tsena tse sa tlwaelehang o ile wa qalwa ke mme Mamoeletsi Lesekele (55) selemong se fetileng. Ho ya ka mme Mamoeletsi ya dulang motsaneng wa di-F ho la Botshabelo, o ile tlelwa ke kgopolo ya ho etsa mofuta o tla tlisa leano le letjha la ho iketsetsa kgaretene. Mme enwa ya nang le bana ba bahlano o hlalositse hore kamora ho ithuta ka mathata a tlhaho a tobaneng le ho etsa masela le motlakase, o ile a qapa mokgwa wa ho etsa dikgaretene tse sa hlokeng disebediswa tseo. Se thabisang ka dikgaretene tsena ke hore, ha di hloke le tshebediso ya metsi a mangata.
Mme Mamoeletsi o hlalositse hore, o ile a iketsetsa kgaretene ya hae ya pele a sebedisa dikwahelwana tsa dinwamaphodi tsa mefuta yohle. O ile a qala ka ho bokella dikwahelwana tse lekaneng ho ka etsa kgaretene ya boholo ba dimitara tse pedi. Ka ho hlokomela katleho ya hae, o ile a thabiswa ke sena. Hang kamora hore a fanyehe kgaretene ya hae ka phaposing ya hae ya ho phomola lapeng ha hae, e ile ya hapa maikutlo a bo-mme ba bang ba motseng wa habo. “Bo-mme ba ileng ba bona kgaretene yaka ya dikwahelwana tsa dinwamaphodi ba ile ba kopa hore ke ba rekeisetse yona. Ke ha ke tlelwa ke kgopolo ya hore ke bokelle bomme ba bang ba sa sebetseng jwalo ka nna re iqalle kgwebo,” ho hlalosa mme Mamoeletsi.
Ka ntle le tikatiko, bo-mme ba bararo bana, e leng, Ntsoaki Makatisisi, Makatiso Phetha le Nozamile Mmolaoa ba ile ba qala mosebetsi. Bo-mme bana ba bararo ba neng ba thabetse leano lena le mme Mamoeletsi la ho ba ntsha ka hara mathata a tlala le bofuma ka lebaka la tlhokeho ya mosebetsi ba ile ba sebetsa ka thata ho ithuta ho etsa mofuta ona wa dikgaretene o sa hlokeng motjhini wa mofuta ofe kapa ofe hore di etswe. Se thabisang bo-mme bana ba kgothetseng ke hore dikgaretene tsena tsa bona di rekwa haholo ka hara motse wa habo bona.
Mme Mamoeletsi eo e bileng e leng moetapele wa bo-mme bana ba bang o motlotlo ka katleho ya bona. O hlalositse hore ba thonaka dikwahelwana tsa bona dibakeng tse fapaneng kahara motse wa habo bona. Ere kaha ho nka makgolokgolo a dikwahelwana ho ka phetha kgaretene ya boholo ba dimitara tse pedi, ba sebetsa dihora tse telele ho bokella thepa yohle eo ba e hlokang bakeng sa ho ntshetsa pele mosebetsi wa bona ntle le tikatiko. “Mosebetsi wa rona o boima, mme o hloka mamello e kgolo. Ntho e monate ke hore re a utlwana mme re dula re dumellana ka tsohle ho ntshetsa pele mosebetsi ona wa rona,” ho hlalosa mme Mamoeletsi.
Mme Mamoeletsi o boletse hore se thabisang ke hore dikgaretene tsena tsa bona di hloka metsi le sesepa tse nyane bakeng sa ho hlatsuwa. O ile a tswelapele ka hore, di bohlokwa haholo hobane di baballa tikoloho mme di bile di tlisa bohlweki setjhabeng hobane ba dula ba hleka le ho phuta hohle moo dikwahelwana di tletsatletseng. – MATSEKO RAMOTEKOA
info@bloemfonteincourant.co.za