AfriForum het by die Mangaung Metropolitaanse Munisipaliteit (MMM) ’n dringende beroep gedoen rakende vullisverwyderingsdienste. Meer as 600 huishoudings, saam met AfriForum, het aansoek gedoen om nie die munisipaliteit se vullisverwyderingsdienste te gebruik nie en wil eerder privaat vullisverwyderingsdienste gebruik vanweë die swak dienslewering deur die metro.
Inwoners het aansoek gedoen vir die kansellasie van die munisipaliteit se diens en versoek dat hulle nie daarvoor hoef te betaal nie. AfriForum het die munisipaliteit gevra om geen vullisverwyderingsrekeninge aan hierdie aansoekers te stuur nie. Tog het die aansoekers te hore gekom dat die metro nie van plan is om hul aansoeke te aanvaar nie.
AfriForum oorweeg nou om verdere stappe te neem om hierdie saak op te los, maar daar is nie verdere spesifieke inligting verskaf oor wat daardie stappe mag wees nie. “Baie huishoudings in Bloemfontein maak gebruik van privaat vullisverwyderingsdienste omdat Mangaung se dienslewering uitermatig swak en sporadies is,” sê Petrus Coetzee, AfriForum se raadgewer vir plaaslike regeringsake. “Munisipale vullisverwydering vind soms weke lank glad nie plaas nie en skep al vir etlike jare geweldige frustrasie onder inwoners. Mense het genoeg gehad van die onbevoegde metro en daarom wil AfriForum ’n alternatiewe oplossing bied.”
Coetzee beweer dat plaaslike regulasies van die metro die inwoners toelaat om aansoek te doen vir die kansellasie van die munisipale vullisverwyderingsdiens, asook vir die kwytskelding van betaling vir daardie diens. “Die Mangaung-metro versuim in sy grondwetlike plig om volhoubare vullisverwydering aan sy inwoners te verskaf. Dit is daarom irrasioneel om te eis dat inwoners moet betaal vir ’n diens wat nie gelewer word nie. Die kansellasie van munisipale vullisverwyderingsdienste en die aanstelling van privaat diensverskaffers kan ’n volhoubare alternatief vir veral deeltitelskemas en komplekse wees omdat dié dienste beter en goedkoper sal wees,” het hy gesê.
“Inwoners van Bloemfontein behoort te kan kies of hulle privaat of munisipale vullisverwyderingsdienste wil gebruik. Ons is bereid om die hof te nader en alles moontlik te doen sodat die inwoners van Bloemfontein hierdie reg kan uitoefen. Daar is verskeie privaat kontrakteurs wat reeds jare lank al hierdie diens aan inwoners lewer en oorgehaal is om hierdie diens in sy geheel by die metro oor te neem. Die enigste struikelblok is tans die dubbele betaling van vullisverwyderingsdienste, maar AfriForum beplan om hierdie struikelblok binnekort uit die weg te ruim,” het Coetzee afgesluit.
