Bloem-dansers dans hul pad oop na Engeland

0
1059
Die dansers wat Bloemfontein gaan verteenwoordig, is van links, 4de ry: Cara van der Bijl, Feliciana de Almada, Lelani Theron, Jané Rautenbach, Jaydene Barnard en Nadine Heys; 3de ry: Angela Kgamanyane, Erin Schoombie, Wianca Agenbach, Chanel Vorster en Mia van der Walt; 2de ry: Mariana de Almada, Fundukuhle Molaba, Orefile Kgamanyane, Leané de Smidt en Letitia de Smidt; en voor: Lesedi Kgamanyane. FOTO: ILZE DE SMIDT

’n Groep Bloemfonteinse dansers het vertrek na Blackpool in Engeland vir die 2023 Freestyle en Slow Dance Wêreldkampioenskappe.

Volgens Senicia du Toit-Breytenbach moes hierdie dansers in verskeie wêreld kwalifiserende rondtes sake uitspook om as oorwinnaars onder die Top 6 in hul ouderdomskategorieë in Suid-Afrika te eindig.

Die dansers is van die volgende vier ateljees in Bloemfontein: Dance Domination, bestuur deur Du Toit-Breytenbach; Dance Domination, bestuur deur Manulani Cohen; Dazzling Dance Studio; en Just Dance. “Onder hierdie dansers is verskeie Suid-Afrikaanse Kampioene, wat nommer een in die land is. Ons is so trots op hierdie dansers en kan nie wag om te sien hoe hulle van 23-25 Junie in die Verenigde Koninkryk vaar nie,” het Du Toit-Breytenbach gesê.

Sy het bygevoeg dat twee afrigters, syself en Liezl Luyt, na die Wêreldkampioenskappe gaan en deel van die elite-paneel van meer as 40 beoordelaars regoor die wêreld sal wees.

Justine Fortuin
justine@mahareng.co.za