CHRISTAL-LIZE MULLER
Die Vrystaatse onderwysdepartement het vanoggend die geskorste skoolhoof van die Laerskool Wilgehof in Bloemfontein summier uit sy pos ontslaan.
Dit kom nadat Fanie Roeloffze vroeër vandeesmaand in ‘n dissiplinêre verhoor deur die departement skuldig bevind is op twee aanklagte dat hy sy pligte swak en onvoldoede uitgevoer het.
Hy het nie toegesien dat ‘n ou landsvlag en beweerde beledigende foto’s van ape en Julius Malema in ‘n klaskamer by die skool verwyder is nie.
Roeloffze se prokureur, Marius van Rensburg, sê hulle gaan appelleer teen die voorsittende beampte van die verhoor, Mpe Ncgosane, se skuldigbevinding en strafoplegging.
Van Rensburg sê hy volstaan by sy kliënt se onskuld. Volgens hom gaan Roeloffze hom tot die Raad vir Arbeidsverhoudinge in Onderwys (Ravo) wend, wat ‘n onafhanklike arbiter in ‘n nuwe arbitrasie sal aanstel.
