Tsoseletso nou een van vier Duitse Vennootskole

0
432
Mantwa Khubeka, Kgomotso Mojahi (wat albei 'n taalkursus van die Gieseke & Devrient Siftung in München bygewoon het), Elna van Rensburg (Duits-leerkrag), dr. Ulrike Lewark (Taal-departementshoof van die Sub-Sahara Afrika: Goethe-instituut), Anita Ohl-Meyer (Eerste Sekretaris, Duitse Ambassade, Pretoria), Katleho Khautsane en Palesa Ntsabo (wat albei op 'n Pasch Jugendkurs in Frankfort was).

Afgevaardigdes van die Duitse ambassade en Duitse Goethe-instituut het kort voor die einde van 2016 die Metro besoek toe hulle die bekendstelling van Tsoseletso Hoërskool se Deutsch Pasch Schule (skool) bygewoon het.
Die skool se nuwe status sluit ‘n reuse-skenking van nuwe tegnologie in, soos ‘n Smart Board en splinternuwe rekenaars wat in die Duits-klas deur die instituut geïnstalleer is. Dit behels ook die voorsiening van leermateriaal, asook twee bykomende beurse vir leerders om die Duitse taal jaarliks in Duitsland te gaan bestudeer. Tsoseletso is nou een van vier Duitse Vennootskole (German Partner Schools) in die land. Die ander skole wat die Pasch-status deel, is Hoërskool Witteberg in Bethlehem, Hoërskool Linden in Johannesburg, en Paul Roos Gimnasium in Stellenbosch.
Pasch staan vir “Schools: Partners for the Future” en is ‘n wêreldwye netwerk van meer as 1500 skole wat ‘n hoë waarde op Duits plaas. Dit is ‘n inisiatief van die Federale Buitelandse Kantoor in samewerking met die Sentrale Buro vir Skole in die buiteland (ZfA), die Goethe-instituut (GI), die Duitse Akademiese Uitruildienste (DAAD) en die Opvoedkundige Uitruildienste van die Staande Konferensie van die ministers van Onderwys en Kultuursake van die Länder in die Federale Republiek van Duitsland (PAD).
Elna van Rensburg, Tsoseletso se Duits-onderwyser en die stuurkrag agter die skool se sukses, sê die skool se sukses kan toegeskryf word aan die gemotiveerde leerders wat hul beste doen ten spyte daarvan dat Duits ‘n ekstra vak is, die volgehoue toewyding van borge wat daarin glo, asook die voortdurende ondersteuning van die wyer gemeenskap.
“Om as ‘n Deutsch Pasch Schule aangewys te wees stel ons in staat om leerders beter in staat te stel om soveel meer te kan doen. Behalwe vir die uitruilprogramme is daar ook talle kursusse waaraan leerders in Suid-Afrika kan deelneem. So kon vier leerders byvoorbeeld reeds ‘n taalkursus in Duits in München en Frankfurt meemaak, en van 2 – 22 Julie sal twee leerders in Schlitz, Duitsland, ook ‘n taalkursus bywoon, In Augustus vanjaar sal twee van die skool se leerders ook aan ‘n mediakursus in Durban deelneem.”
Borge en ander belanghebbendes wat die skool se Duits-leerders finansieel bystaan om aan die Jeug-uitruilprogram in Duitsland deel te neem, het ook die geleentheid bygewoon. ‘n Groep van ses Duits-leerders het onlangs van só ‘n uitruilprogram (FSA Youth Exchange) teruggekeer. Hul Duitse toer het reeds op 2 en 14 Desember begin. Die skool het sedert 2006 reeds 32 leerders na Duitsland gestuur om aan die uitruilprogram deel te neem. – Maricelle Botha 
maricelle@centralmediagroup.co.za