SA Weerdiens waarsku teen sterk wind

0
414

Die Suid-Afrikaanse Weerdiens het gewaarsku teen sterk wind in sommige dele van die Vrystaat en Noord-Kaap. ‘n Weervoorspeller van die Bloemfonteinse-weerkantoor, Tumi Phatudi, sê ‘n windsterkte van tot 62km per uur is reeds vanoggend by tye in die suidwestelike deel van die Vrystaat van Bloemfontein (in die sentrale deel van die Vrystaat) in die rigting van Kimberley gemeet.

Sy sê ‘n gemiddelde windsterkte van sowat 40km per uur, wat plek-plek ook meer as 60km per uur is, kom in die suidoostelike deel van die Noord-Kaap voor. Phatudi vra veral motoriste om versigtig te bestuur omdat die sterk wind voertuie van die pad af kan ruk.

Daarmee saam is dit ook stowwerig en deinserig op paaie. Dié toestande belemmer bestuurders se sig. Die winderige toestande veroorsaak ook ‘n gevaar vir veldbrande, hoewel die risko vir dié tipe brande laer is weens natter toestande. Dit het die afgelope twee dae kol-kol in sommige gebiede in die Vrystaat gereën. Phatudi waarsku egter dat mense hul steeds moet weerhou daarvan om oop vure te maak. Sy sê die sterk wind kan teen later vanmiddag ietwat bedaar. – Christal-Lize Muller