PUK-student oorlede weens nie-aansteeklike breinvliesontsteking

0
642

Nie-aansteeklike breinvliesontsteking was die oorsaak van die skielike dood Vrydag van die eerstejaarstudent, Ettienne de Villiers, van die Noordwes-Universiteit se Potchefstroomkampus.

Die universiteit het intussen gevra dat alle bespiegelinge en gerugte oor die vermeende oorsake van De Villiers se dood gestaak moet word.

Kampusrektor, Fika Janse van Rensburg, sê die universiteit sou onmiddellik die nodige stappe gedoen het indien enige aansteeklike siekte sou uitbreek.

Janse van Rensburg sê ‘n nadoodse ondersoek het bevestig die student het virale enkefalitis gehad.

Dit is nie die aansteeklike breinvliesontsteking (bakteriële meningkokkale meningitis) nie.

De Villiers is Vrydagmiddag skielik oorlede in sy woonstel naby die kampus. Hy is gevind deur ‘n vriend wat bekommerd geraak het toe hy hom nie kon kontak nie.

Janse van Rensburg het sy meegevoel uitgespreek met die De Villiers-gesin, -familie, sy kamermaat en vriende.

Andre Grobler/Courant Nuus