Opruimingswerk begin na haelstorm Bloemfontein tref

0
990

Opruimingswerk het gisteraand in verskeie dele van Bloemfontein begin nadat dié stad en verskeie ander dorpe in die Vrystaat laatmiddag onder hewige hael en reën deurgeloop het.

‘n Skielike haelstorm het chaos in Bloemfontein veroorsaak. In sommige strate het haelkorrels en reën opgedam. By Prellerplein in die noorde van die stad het die erge hael op plekke kniediep gelê.

Stootskrapers is gisteraand gebruik om haelkorrels te verwyder sodat motors, waarvan die wiele toe was onder ‘n wit kombers haelkorrels, verwyder kon word.

This slideshow requires JavaScript.

Lede van sekuriteitsmaatskappye het in Christo Groenewald-laan, waar ‘n gedeelte van die pad deur opgehoopte haelkorrels versper is, gereguleer.

In die Northridge Mall het haelkorrels en reën deur die dak gelek. Motors is beskadig en gate is in motorvensters geslaan. Skade is ook aan huise aangerig.

In die Dan Pienaar-uitbreiding het ‘n deel van ‘n huis se plafon ingeval en bome se takke is afgeruk. ‘n Buitemuur van ‘n huis in Pentagonpark het omgeslaan.

In Jagersfontein het haelkorrels so groot soos gholfballe ook skade aangerig.

Die hael het gate in motors geslaan. – Christal-Lize Muller