Oorsaak na busongeluk by Golden Gate word ondersoek

0
634
FOTO: EMS

 

Die Padverkeerbestuurskorporasie, in samewerking met die polisie in die Vrystaat, se ondersoek na Vrydag se busongeluk waarin 11 weermaglede dood is, duur voort. Die korporasie se Simon Zwane, sê forensiese ondersoekspanne het die ongelukstoneel in die Golden Gate Hoogland Nasionale Park die naweek besoek om meer inligting oor die omstandighede en die omgewing waarin dit plaasgevind het te verkry. Zwane sê die bus met meer as 40 insittendes het by ‘n skerp draai die pad verlaat en omgeslaan.

Lede van die ondersoekspanne het na die toestand van die pad gekyk,  en onder meer die weerstoestande in ag geneem.

Hy sê die wrak, wat na ‘n perseel op Ladybrand geneem is, sal vandeesweek nagegaan word. Die insittendes wat die ongeluk oorleef het, moet ook ondervra word voordat ‘n finale verslag vrygestel kan word. Zwane sê dit kan selfs langer as twee weke neem.

Die weermag het intussen nog geen begrafnisreëlings bevestig nie. – Christal-Lize Muller