Jongman bring mense byeen vir reën

0
2389
Inwoners van Bloemfontein bid saam vir reën. FOTO: CHRISSIE GERICKE

‘n Jong, verloofde inwoner van Pellissier in Bloemfontein het uit sy eie leiding geneem en weeklikse bidsessies begin waartydens enigiemand kan saambid vir reën om verligting in droogtegeteisterde dele van die land te bring. Die 26-jarige Hendrik Gericke, ‘n verkoopskonsultant in die boubedryf, het vier weke gelede ” ‘n boodskap van God ontvang”. Hy moes mense byeenbring om vir reën te bid.
“God het dit op my hart gelê.” Gericke sê mense praat, maar niemand neem leiding en voeg daad by die woord nie. Hy is aanvanklik aangespoor om dié sessies ‘n werklikheid te maak nadat hy sowat vier weke gelede diep geraak is deur ‘n video op sosiale media. In dié video word daar vertel van ‘n jong man wat huil oor sy pa wat meer as 50 beeste van kant moes maak weens die droogte. Gericke het kort daarna besluit daar is geen terugdraai-kans nie. Hy is ‘n lid van AfriForum se Sektor 5-buurtwag in die stad en het boodskappe aan bestaande groepe op sosiale media (Facebook en WhatsApp) uitgestuur.

Hierin het hy sy plan om ‘n bidsessie op 15 Oktober in ‘n oop stuk veld in Pellissierrylaan oorkant die Engen-vulstasie te hou, met ander gedeel. “Ek het niemand persoonlik uitgenooi nie.”
Sowat 80 mense het die eerste bidsessie bygewoon. Gericke sê hy het met gebed en skriflesing geopen en daarna met gebed afgesluit. Diegene wat wou, kon saambid. Sedertdien word daar elke Saterdag omstreeks 14:00 op dieselfde plek vir reën gebid. Hy sê as God die reën stuur, soos die geval was die afgelope naweek, dan word daar op dié sessies dankie gesê.
“God weet wat ons benodig. Hy weet presies hoeveel water ons kort.” Hulle vra nie dat God die land se opgaardamme op een slag met reën sal vul nie óf dat die droogtekrisis meteens deur God opgelos word nie. “Ons bid vir reën op God se tyd.” Sy tydsberekeining is nie die mens s’n nie.
Gericke sê hy is ‘n eenvoudige Christen-mens. Hy is nie ‘n predikant wat voor duisende kan preek nie. Hy voer slegs ‘n opdrag van God uit. Hy glo onwrikbaar in God.
Mense wat belangstel om die volgende bidsessie eerskomende Saterdag in Pellissierrylaan by te woon is welkom. Vir meer inligting kan Gericke by 072-732-3535 gebel word. – Christal-lize Muller
christal-lize@centralmediagroup.co.za