Jong man geklee in ‘n polisie-uniform moet nou in hof verduidelik

0
469
Photo: sabreakingnews.co.za

‘n Jong man, wat vermoedelik ‘n misdaad wou pleeg, sal na verwagting môre in die Bloemfonteinse landdroshof verskyn nadat hy gister, geklee in volle polisie-uniform, naby ‘n plaaslike laerskool in hegtenis geneem is.

Polisiewoordvoerder, Peter Kareli, sê die verdagte vermoedelik van Virginia, maar oorspronklik van Mosambiek, het hom voorgedoen as ‘n polisiebeampte.

Die jong man se presiese ouderdom is onbekend, maar hy het aangedui hy is 18.

Lede van Bayswater-polisiekantoor se misdaadvoorkomingseenheid het hom omstreeks 10:30 in Louw Wepenerstraat, Dan Pienaar, gewaar. Hy het stilgestaan.

Hulle het hom genader. Hy was netjies geklee in ‘n polisie-uniform. Kareli sê net die swart formele skoene wat hy aangehad het, het nie by die uniform gepas nie.

Die verdagte kon nie verduidelik waar hy die uniform gekry het nie. Hy het ook vals inligting oor sy woonadres aan die polisie verskaf. Hy het geen identiteitsdokument in sy besit gehad nie.

Kareli sê polisielede het verder onraad vermoed toe ‘n inspekteurrang op die verdagte se polisie-uniform aangebring is.

Dié rang is al deur die polisie uitgefaseer en is met die rang van adjudant-offisier vervang. Die verdagte staan tereg op ‘n aanklag dat hy hom as ‘n polisiebeampte voorgedoen het.

Christal-Lize Muller/Courant-nuus