Gemeenskap staan saam om brand te blus in Winburg-stadsaal

0
843
Die stadsaal op Winburg voor ‘n brand gister onder die verhoog ontstaan het. FOTO: FACEBOOK

‘n Brand wat laat gistermiddag in die historiese stadsaal op Winburg in die Vrystaat uitgebreek het, is later deur lede van die gemeenskap en ander betrokkenes geblus.

Polisiewoordvoerder, Mamello Mokhoane, het gisteraand aan Courant gesê rook het omstreeks 17:40 by die gebou, wat se deure gesluit was, uitgeborrel. Inwoners het egter toegang verkry.  Volgens haar het die brand het onder die verhoog met houtplanke ontstaan.  Plaaslike inwoners, boere met hul vuurvegters, gevul met water, en werknemers van kontrakteurs wat konstruksiewerk aan die N1 doen het met watertenkwaens by die gebou opgedaag om die vlamme te blus en sodoende te voorkom dat die brand nie verder verwoesting saai nie.

Mokhoane het gesê die skade is slegs aan die verhoog. Niemand is beseer nie. Volgens haar het die brand vermoedelik weens ‘n elektriese kortsluiting ontstaan. Die Matjhabeng-brandweer se ondersoek duur voort. ‘n Inwoner, Annaria Campher, het gesê die gemeenskap het saamgestaan en by die stadsaal opgedaag met water om te keer dat die ou gebou verder in die brand verwoes word. Volgens haar was die brand kort voor 19:00 geblus. – Christal-lize Muller