Brand beskadig Wepener-stadsaal

0
1184

 

Die polisie in die Vrystaat ondersoek die moontlikheid van brandstigting nadat die historiese stadsaal op Wepener vanoggend vroeg in ‘n brand beskadig is.
Polisiewoordvoerder, Yanga Ngcukana, het bevestig dat dele van die saal, waar die munisipale geboue geleë is, omstreeks 02:00 vanoggend aan die brand geraak het.
Hy sê die oorsaak van die brand is nog onbekend en dat dit deel sal vorm van die polisie se ondersoek. Ngcukana sê die brand is reeds vanoggend vroeg geblus.
“Ons kan op hierdie stadium nie sê waar in die gebou die brand begin het nie. Dit is net die hoofsaal wat in die brand beskadig is, en ons is gelukkig dat die munisipale kantore nie self uitgebrand het nie. Daar was ook nie enige dokumente wat in die proses vernietig is nie.”
Hoewel brandstigting as moontlike oorsaak nie uitgesluit word nie, is geen verdagtes nog in verband met die voorval in hegtenis geneem nie.
Die sandsteengebou is in 1927 opgerig. – Mark Steenbok, OFM News
mark@centralmediagroup.co.za