Afrika-skole-pluimbaltitel kom straks weer Bfn toe

0
1386
Die Hoërskool Jim Fouché (JF) se meisies is onlangs gekroon as die Suid-Afrikaanse skolekampioene, terwyl Fichardtpark se seuns die tweede plek by die einste byeenkoms verower het. Hier is hulle van links Zoe Bezuidenhout, Francois Claasens, Nita Scholtz, Chris Joubert, Liané de Beer, Zander Vorster, Christie Cloete, Tiaan Krause en Jolene Bester. FOTO: JOHAN KLEINGELD

Die Hoër Meisieskool Eunice is in 2014 en 2015 gekroon as die Afrika-skole-pluimbalkampioen in die meisiesafdeling en soos dinge nou lyk, gaan dié gesogte titel vanjaar weer in ‘n Bloemfonteinse skool se skoot val. Dié keer is die Hoërskool Jim Fouché (JF) se kanse meer as rooskleurig om as Afrika-kampioen gekroon te word.

Eunice se genoemde Afrika-oorwinnings was hoofsaaklik te danke aan die twee skitterende nasionale junior spelers, Leah Schoeman en Nita Scholtz. Schoeman is egter nie meer ‘n skolier nie en Scholtz het intussen besluit om Eunice vir JF te verruil.

Met Scholtz aan die spits van JF se opmars in pluimbal, is JF ‘n harde neut om te kraak.
Dit is bewys toe JF onlangs gerieflik met die naasbeste in die land, Diamantveld (Kimberley), afgereken het met 3 – 1 in die nasionale eindronde. JF se doelwit, veral met vyf meisies in sy geledere wat slegs 15 jaar oud is, is om die Afrika-titel die volgende drie jaar hul eie te maak.

Die gehalte van pluimbal in die Rosestad is weer eens onderstreep deur die seuns van die Hoërskool Fichardtpark wat op die SA skolebyeenkoms die eindstryd gehaal het en slegs voor Durban Boys’ High die knie moes buig (3 – 1).

Buiten vir bogenoemde suksesse, blyk die Vrystaat se pluimbaltoekoms steeds rooskleurig, veral met jong spelers wat na vore tree. Van die jong manne wat reeds hul hande opgesteek het as beste in die land, is Jan-Hendrik Knox (Grey) en Logan van Wyk (Fichardtpark). Dié manne is gekroon as die SA dubbelskampioene in die seuns o.13-afdeling, terwyl Van Wyk silwer in die enkelspel gebuit het.

In die o.9-ouderdomsgroep het die Rosestad ook ‘n nasionale kampioen opgedis. Ané Oberholzer (Fichartpark) het in die enkel- en dubbelspel vir meisies goud om die nek gehang.  – RUFUS BOTHA